عالغلبان
مايل يا زمان
هلال البنا
...............
عالغلبان مايل .....يازمان
تسقي الناس مر....وقطران
وإللي يقولك آه.... تعبان
تملاله كاس.. .. الحرمان
وكل ضرباتك في المليان
يازمان ...... مايل عالغلبان
أنا عارف صحاب وجيران
مش لاقيني حتى... الإحسان
ناس كان ليها معاش... قطعوه
صاحب عيال عاطل عيان
شالوا معاشه... وليه فصلوه
وخلوا حزنه صبح أحزان
عالغلبان مايل ..... يازمان
واحد عنده تلاته عيال
هو والست أم لعيال
ولافيش دخل واقف الحال
والأسعار فوق أيي خيال
خليك انت مكانه ياخال
يابو كرفته ويابو عقال
ترضى تكون ضمن العمال
واتعيش كده على قد الحال
بكام جنيه أو كام ريال
واتشيل هم مصاريف وعيال
يازمان............ مايل عالغلبان
وحده جوزها سابها ومات
عندها طفل اخواته بنات
عملت فرش بلاستيكات
ومقشات ومساحات
تكسب منه يدوب جنيهات
لأجلي عيالها تلاقي القوت
عدت حملة ..... إشغالات
وخدت كل البلاستيكات
عالغلبان مايل ..... يازمان
واحد عنده معاش تأمين
سبعو ميه و خمسين
هو وزوجته وعنده إتنين
وللمصاريف محتاج ألفين
الكهربا جايه ستوميه
غير الدوا والغاز والميه
واحد عنده تقوى ودين
يقولي اجيب الباقي منين
عالغلبان مايل ...... يازمان
واحد عمره فوق الستين
ونظره ضعيف و فقير مسكين
محتاج حد يكون له معين
ياخد بإيده صبح وليل
ويكون له مسند ودليل
وبلاش قسوه وذل وويل
وللآ بقيت أسود يازمان
ومفيش وا حد عنده حنان
وعالغلبان مايل....... يازمان
وساقي الناس مر.... وقطران
وإللي يقولك آه. ...... تعبان
تملاله كاس .... الحرمان
وكل ضرباتك في المليان
.................. عالغلبان
مايل يا زمان
هلال البنا
عنوان الموضوع: "مايل يا زمان بقلم هلال البنا"
إرسال تعليق